Web Content Display Web Content Display

የኢትዮጵያ የኮንስትራክሽን ዲዛይንና ሱፐርቪዥን ሥራዎች ኮርፓሬሽን

የኢትዮጵያ ኮንስትራክሽን ዲዛይንና ሱፐርቪዥን ሥራዎች ኮርፖሬሽን በሚኒስትሮች ም/ቤት ደንብ ቁጥር 365/2008 ዓ.ም የተቋቋመ ሲሆን ለኮርፖሬሽኑ የተፈቀደ ካፒታል 1,3ዐ1,515,785 ብር /አንድ ቢሊዮን ሦስት መቶ አንድ ሚሊዮን አምስት መቶ አሥራ አምስት ሺህ ሰባት መቶ ሰማንያ አምስት ብር/ ነው፡፡ ከዚህ ውስጥ ብር 393,771,99ዐ / ሦስት መቶ ዘጠና ሦስት ሚሊዮን ሰባት መቶ ሰባ አንድ ሺህ ዘጠኝ መቶ ዘጠና ብር/ በጥሬ ገንዘብና በዓይነት የተከፈለው የልማት ድርጅት ነው፡፡

 

የኮርፖሬሽኑ ራዕይና ተልዕኮ

ራዕይ፡-

"በ2ዐ17 ዓ.ም በምህንድስና የማማከር አግልግሎት በእውቀት እና ፈጠራ ሥራ ላይ የተመሠረተ፤ አለም አቀፍ ደረጃን ያሟላ አስተማማኝ አማካሪ ድርጅት መሆን"።

ተልዕኮ፡-                 

ኮርፖሬሽኑ በአዋጅ ከተሰጡት በርካታ ተልዕኮዎች ውስጥ እንዲያሳካ የሚጠበቅበት ዋና ዋናዎቹ የሚከተሉት ናቸው፡፡

  • በውሃ፣ በኃይል ማመንጫ፣ ሕንፃ፣ ከተማና ገጠር ልማት እንዲሁም የትራንስፖርት ዘርፍ የጥናት፣ የልማት ዕቅድ ዝግጅት፣ የቅየሳ፣ የዲዛይን፣ ግንባታ ቁጥጥር፣ የኮንትራት አስተዳደር እና የፕሮጀክት አስተዳደር ሥራ አዋጭ፣ ውጤታማ እና ቀልጣፋ በሆነ መልኩ ሀገራዊ እና አለም አቀፋዊ የሥራ ደረጃዎችን በሟሟላትና የደንበኞችን እርካታ ባረጋገጠ መልኩ መፈፀም፤
  • የማማከር አገልግሎቶችን ጥራትና ልቀትን በአማከለ እንዲሁም በዋጋ ተወዳዳሪ በሆነ መልኩ የደንበኞችን የጥራት፣ የጊዜ፣ የምህንድስና ውቅሮች እና አካባቢያዊ ደህንነት ፍላጐቶች ሟሟላት፤
  • ሀገሪቱ ላቀደቻቸው ልማቶች እና ፕሮጀክቶች በተሟላ መልኩ ለመፈፀም አስፈላጊ የሆኑ የዕውቀት ክህሎት እና የቴክኖሎጂ ሁኔታዎች በሚፈለገው ዓይነት፣ መጠንና ጥራት መገንባት፤
  • በሀገራችን በልማታዊ መንግሥት ስልት ውስጥ በመሠረተ ልማት ዘርፍ የሉ የገበያ ክፍተቶችን መሙላት፣ ገበያን ማረጋጋት እንዲሁም በሀገር ውስጥና በውጭ አገራት ተወዳዳሪና አትራፊ ሆኖ ለመንቀሳቀስ የሚያግዙትን የፋይናንስ፣ የቴክኖሎጂና የዘመናዊ አስተዳደር ግብዓቶች የሚያስገኝለትን ኢንቨስትመንት መሳብና በኢንቨስትመንት መሳተፍን ጨምሮ ጥናት ማካሄድ እና መተግበር ናቸው፡፡

ይህ ኮርፖሬሽን በሥሩ አራት ዘርፎችና ሁለት ማዕከላት አሉት፡፡ እነርሱም፡-

  • የትራንስፖርት ዲዛይንና ቁጥጥር ዘርፍ፣
  • የውሃና ኢነርጂ ዲዛይንና ቁጥጥር ዘርፍ፣
  • የህንፃና ከተማ ዲዛይንና ቁጥጥር ዘርፍ፣
  • የጂኦቴክኒካል ኢንቨስትጌሽን፣ ኢንጂነሪንግና የምድር ውስጥ ውቅሮች ጥናት ዘርፍ፣
  • የላብራቶሪ፣ ምርምርና ስልጠና ማዕከል እና
  • የቅየሳ፣ ጂኦስፓሺያልና ኢንፎርማቲክስ ማዕከል ናቸው፡፡

የሰው ኃይል፡-

ኮርፖሬሽኑ በተለያዩ የኢንጂነሪንግ ትምህርቶች ከፍተኛ የሆነ ልምድ እና ክህሎት ባካበቱ ባለሙያዎች አገልግሎት በመስጠት ላይ ይገኛል፡፡ በአሁን ወቅት በኮርፖሬሽኑ 1785 የሠው ኃይል ያለው ሲሆን ከዚህ ውስጥ 868 ቋሚ እና 917 ኮንትራት ሠራተኞች ናቸው፡፡ እንዲሁም 1185 ቴክኒካል እና 600 ድጋፍ ሰጪ ሠራተኞች ያሉ ሲሆን በፆታ ስንመለከተው 1348 ወንድ እና 442 ሴት ሠራተኞችን ይዞ በማስተዳደር ላይ ይገኛል፡፡

ኮርፖሬሽኑ በአሁን ወቅት እያከናወናቸው ያሉ ዋና ዋና ተግባራት፡-

ኮርፖሬሽኑ በ2008 በጀት ዓመት ካከናወናቸው ተግባራት መካከል በኤርፖርት፣ ኤርፊልድ፣ በመጠጥ ውሃ አቅርቦት፣ በግድብና መስኖ ስራዎች፣ በጥልቅ ውሃ ፍለጋ፣ በመንገድ ስራ፣ በህንፃና ከተማ ልማት ሥራዎች እና ሌሎች የመሰረት ልማት ፕሮጀክቶች ላይ የግንባታ ቁጥጥር፣ የኮንትራት አስተዳደር፣ የቅየሳና ዲዛይን፣ የጥናት፣ የጂኦቴክኒካል ኢንቨስትጌሽን፣ የላብራቶሪ ምርመራ፣ የኮርፖሬት ሰርቪስ አስተዳደር እና የማማከር አገልግሎቶችን እና ሌሎች አገልግሎቶችን ለደንበኞቹ በጥራትና በተመጣጣኛ ዋጋ እየሰጠ ይገኛል፡፡

 

የኮርፖሬሽኑ አድራሻ፡-አዲስ አበባ ቦሌ ክፍለ ከተማ ገርጂ ማዞሪያ ቦምባርሊ አደባባይ አካባቢ ነው፡፡